Por que existe Ardeiro.AI

Levo desde 2004 traballando con robótica e automatización. Empecei instalando robots de dispensación en farmacias, despois pasei a xestionar operacións técnicas para multinacionais do sector saúde e, máis adiante, a deseñar fluxos software que se encargaban de tarefas repetitivas: descargar documentos, clasificalos, xerar informes.

Sempre o mesmo patrón: identificar tarefas que ninguén debería ter que facer a man e quitalas do medio.

O problema que vexo nos pequenos negocios

Cando saio das oficinas e falo con xente que ten unha clínica dentária, unha asesoría, un centro de estética ou unha academia, atópome co mesmo:

• Confirman citas a man.
• Perseguen documentación cada trimestre.
• Esquécense de pedir reseñas xustamente cando o cliente está contento.
• Pasan a tarde do venres metendo facturas á xestoría.

Son tarefas de dez minutos que se fan tres veces ao día, cinco días á semana. E fáinas a persoa máis cara do negocio: ti, que es quen sabes do que vai o negocio.

Por que non é "transformación dixital"

Levo dúas décadas vendo como as multinacionais venden "transformación dixital" como un proxecto de doce meses, corenta diapositivas e tres roles novos no organigrama.

Para un negocio de cinco persoas que factura ben pero non ten tempo, iso é un suicidio. O que necesitan é o contrario: algo concreto, montado en semanas, que desapareza unha tarefa específica e que non lles obrigue a cambiar como traballan.

Esa é a única forma na que a IA chega de verdade ao día a día dun pequeno negocio.

Que vou publicar aquí

Este blog non vai ser un catálogo de servizos. Vai ser:

1. Reflexións honestas sobre o que funciona e o que non funciona ao aplicar IA a negocios pequenos.
2. Casos reais anonimizados, cos números reais, sen marketing.
3. Opinión sobre cara onde vai isto e que merece a pena ignorar do hype.

Se algunha vez ves aquí "transformación disruptiva" ou "sinerxías", escríbeme inmediatamente para que o borre.

Manuel